De sjriëvers
Jan Stinges en Ron Aspers klómme, nao same auch al de revues van 2006, 2011 en 2017 te höbbe gesjreve, in de pen en sjreve same de 10e Ruiverse Revue "Is det zoë?", ein niej Ruiverse Revue in 4 bedriëve mit 15 nieje liedjes.
Ron Aspers & Jan Stinges
Ron Aspers
Ron (werkzaam as baovesjoeëls directeur óngerwiës) waas net as collega-sjriëver Jan Stinges Prins van De Windjbuujels (1996) en waas mit Jan aktief biej L’Equipe Ludique (eine groep Ruiverse miense die ein CD maakte mit Limburgse artieste mit liedjes van Ar(Nol)d Wassen t.g.v. Nol ziene 70ste v’rjäördig). Same mit Jan sjreef Ron al de Ruiverse Revues van 2006 (Veur pakke de draod weer op), 2011 (Wao gaon veur haer?!) en 2017 (‘De negende’). Ron teikent dees revue mit Jan veur alle dialoge, alle liedjes en arranzjemente en is orkésleider.
Jan Stinges
Jan (toet veur kort in ‘t dageliks laeve werkzaam as tandjarts oppe Ruiver) noom aan alle vurrige 9 Ruiverse revues deil. Minnig rol is door Jan op ludieke wiës neergezatte. In de lètste Ruiverse Revue vertolkte Jan de rol van ‘Meneer de Negende’. Auch Jan waas Prins oppe Ruiver (1980) en waas jaorelang ‘t gezich van “De lampekap”, LVK-winnaar in 2001. Mit Ron waas Jan aktief binnen L’Equipe Ludique en vertolkte oppe CD ‘De Kontente Miens’ o.a. ‘t nummer ‘De travestiet van Böggenum’. Jan teikent dees revue mit Ron veur de dialoge en de liedjes. Jan zal zellef óngetwiëfeld oppe bühne sjtaon in november 2024.