2024 Is det zoeë?

De tiënde Ruiverse Revue 'Is det zoeë?' waerde geäöpend mit de titelsong van dees revue waonao 't publiek waerde mitgenaome in eine reis door de tiëd. Mit beelde, óngersjteund door eine medley van de band, kwaam me oët in 't jaor 1863. 't Jaor van de krusiale raodsvergadering. 

Burgemeister Bert Janssen en gemeintesikkretaris Rutte (echte name oët dae tiëd) nome plaats aan ein groeëte vergadertaofel veur de gemeinteraodsvergadering. Keuning Willem III haaij namelik eine breef gestuurd. D'r mós eine Riekswaeg gaon kómme dae Mesjtreech mit Nijmege ging verbinje en haaij auch besjlaote det d'r ein sjpaor mós kómme en eine sjtaasie. Wat ginge de gemeinteraodsleeje van Beesel, de Ruiver en Óffebek hiej taege zegge? Wao mós alles kómme te ligge? Veur en nao kwaam de waorzegster langs mit eine veuroëtzeende blik. 

In 't twiëde bdriëf sjting Hotel 'Aan de Sjtaasie' (Keuben) centraal. Tal van gaste kwame langs in dit bekend bedriëf van mooder Mies Keuben, van Sinterklaoze die de Caeciliavieringe van de harmonie, 't fluiterkorps én Jong Nederlandj haaije bezóch toet de biljaartklöp, de doëvemelkers, de sjaakklöp en zellefs keuninklikke gaste (die 't verkiërde hotel ware binnegelaupe). Pietje van Cox van de Bakhei haaij in dit hotel/kefee ziene iërste date oppe Ruiver mit Chantal. 't 'Kóm mei nao de `Bakhei' waas nao dees revue nag dök te huuëre.

Nao de pauze waerde de rockballad 'Ode aan Nol' gebrach, óngersjteund door prachtige beelde van Nol dae ós 10 jaor geleeje is óntvalle en väöl veur de Ruiverse Revue haet beteikent. In dit bedriëf sjting grand-kefee 'Luxor' centraal en waerde 't publiek mitgenaome nao Jo en El Paquay (Biej Pekee). Wat destieds mit De Zusters van De Ruiver biej Pekee gebeurde waerde op beeld en bühne gebrach. Hilarisch.

In 't veerde bedriëf (100 jaor gemeintehoës Oppe Ruiver) sjtinge de kermisexploitante Hinzen, van de Salm en Hoerfnagels centraal die al 75 jaor de kermis oppe Ruiver en in Beesel verzorge. De titel van liedje 14 'Eind good (al good)' laot waal raoije wie dees revue eindigde. 't Kwaam dus tóch nag good tösse Chantal en Pietje van Cox van de Bakhei.

Mit liedje 15 'Det is zoeë' waerde dees 10e Ruiverse Revue, wao-aan ruum 85 miense belangeloos höbbe mitgewerk, aafgesjlaote. Alles ónger regie van Esther Koenen-Jacobs.

De iërste video's: